كل حاجة عن الاستميشن Estimation, بلاعة الوقت والملل

الاستمشين

يعني المعلمة

يعني لعبة الشباب الجامدة أوي

يعني لعبة اللي عندهم مخ بس

يعني مفيش حاجة اسمها قاعدين عالقهوة وبكوتشينة منغير استميشن

يعني لعبة شباب طب في كل المحافظات

يعني اسمع الكلمتين الجايين دول

-------------

الاستميشن دي على أد ما هيا صعبة على أد ما هيا ممتعة على أد ماهيا معقدة في الأول انك تفهمها

لو انت ملكش في الاستميشن خالص اقرا الموضوع ده كذا مرة والعبلك كام بولة هتبقى تمام

لو ليك اقرا الموضوع وراجع نفسك وشوف القواعد التانية

وركز في الحسابات عشان هيا أرزل حاجة في اللعبة ومش أي حد يفهمها

واي استفسار انا معاكو..خبرة 3 سنين

-------------

أول حاجة ايه اللعبة أصلا

انتا عندك الكوتشينة 52 ورقة وعشان كده اللعبة دي لازم تتلعب ب 4 أفراد ولازم بكوتشنة واحدة

كل واحد 13 ورقة

وكل واحد بيحاول ياخد عدد معين من اللمات ( هنشرحها بعدين ) بحيث ان عدد اللمات كل دور لل 4 لاعبين لا يساوي 13
اما اكبر او أصغر من 13

والبولة 13 دور عاديين + دور اسبيشال اسمه دور الداش ( هنشرحه بعدين ) + 5 ادوار اسبشال برضو

وبعد حساب نتيجة البولة اللي يكسب يبقى الكنج

واللي بعده سب كنج sub king

واللي بعده سب كوز

والأخير هوا الكوز

تاني حاجة مصطلحات اللعبة

انجليزي وفرنساوي وعربي

الأول لازم نقول ترتيب الورق حسب القوة

أقوى لون في الكوتشنة هوا الاسبيد ( البج ) وبعدين الهارت وبعدين الدايموند ( الكاروه ) وآخر حاجة التريفل

وهما دول الأربع ادوارالاسبشال اللي قلنا عليهم + دور اسمه دور السانز (مفيش قطوع trump )

ترتيب الكروت

الآس طبعا
الرواه ( الشايب )
الدامة ( البنت )
الجاك ( الولد)
التن لحااد التو

ودي أضعف ورقة وخد بالك منها ممكن تنقذك أو تغرقك

أفويد = انتا معكش لون من ألوان الكوتشينه بعد ما يتفرق الورق ( معاك تلات ألوان بس)

الكوول = المزاد = كل واحد في أول اللعب يحدد القطوع وعدد اللمات اللي قدر ياخدها والقطوع بيكون واحد من الأشكال اللي فاتو او مجهول ( سانز )

صاحب الكول = اللي كسب المزاد

متثبت = واحد طلب الكول بعدد لمات والتاني زود عليه..يعني مثلا انا قلت 4 هارت وانتا قولت 5 هارت يبقى انا كده اتثبتت

كول وز = لاعب هيطلب عدد لمات زي صاحب الكول بس بيشاركه في المكسب ( هنشرحها )

الريسك = عدد اللمات الخطر ( هنشرحها برضو )

الدونت = عدد اللمات اللي مينفعش انك تطلبها ( لازم عدد اللمات كل دور لا يساوي 13 )

الدور أوفر = عدد اللمات اللي الاربع لاعبين هياخدوها أزيد من 13

الدور أندر =عدد اللمات أقل من 13

القطوع (trump) = وهو يتم أختياره لكي تستطيع أن تقطع على اللون اللي معكش منه
يعني القطوع اسبيد والورق عالأرض تريفل وانتا معكش تريفل وعاوز اللمة..ترمى اي ورقة سبيد انشالله اتنين هتاخد اللمة

السنز = انك تدخل الكول منغير لون معين للقطوع والسنز اقوى من كل الألوان بحيث لو حد قال 5 بج مثلا وانتا قلت 5 سنز الكول يرسى عليك وساعتها مش هيبقى في ترامب وانا الورقة الأكبر عالباز هيا اللي تكسب

الباز = قاعدة اللعبة أو أول ورقة اترمت عالأرض

أوفر كت over cut = معناها ان واحد نزل كارت قطوع..ساي 4 بج والتاني نزل كارت اعلى منه ساي 5 بج ( محتاج اللمة )

اندر كت under cut = معناها ان واحد نزل كارت قطوع والتاني نزل كارت أقل منه ( بيخلص منه )

واحد هيقولي حد يخلص من القطوع هقولك ان كل واحد ليه عدد معين من اللمات مينفعش يجيب اعلى منه او أقل منه..يعني لو زود عن عدد اللمات اللي حددها في الكول يكون خسران مش كسبان

فنت = معناها انك سبت اللمة ومرضتش تاخدها سواء معاك من الليون ده تاخدها او بتأفود نفسك في لون

داكك = معناها ان اللاعب ده معهوش ورق كسبان يقدر ياخد بيه لمات ودي بتتقال قبل الكوول وساعتها الدور بيتعاد

وايت فور.. = بتتقال في اول اللعبة عشان محدش يبدأ بالكوول وده بيكون في النتظار اللاعب اللي طلب الويتينج انه يدك الدور أو يطلب داش بلايند

الداش = الصفر = ولا لمة

داش بلايند = ولا لمة منغير معرفة القطوع ( صفر اعمى )

فول هاوس = انتا معاك الكروت كلها من الآس للتن ( آس ورواه ودامه وجاك وتن )

صعايدة = الاربعة معرفوش يلمو عدد اللمات اللي هما عايزينها ومن هنا مرة اربعة صعايدة بيلعبو كوتشينه الاربعة خسرو : D

وساعتها الدور بيتدك ويتعاد ويتلعب دور تاني بنفس ارقم ويتضرب نتيجته في 2 ( دور صعايدة)

قواعد اللعب الأساسيه

1) عدم رفع الكروت أثناء التوزيع وإذا رفعها أحد الاعبين فيكون دونت داش يعني مالوش حق الداش (مينفعش يقول انا مش هاخد ولا لمة )

2) لو أحد الأوراق أثناء التوزيع إنكشفت يحق لصاحبها دك الدور وإعادة التوزيع من جديد

3) عن عدم وجود لون أو أكثر من الأربعة ألوان الأساسيه لابد أن تقول أفويد ولك الحق في دك الدور أو تكملته

4) عند بداية الكول الحد الأدنى من اللمات هو 4 ( مينفعش تقول 3 كاروه مثلا )

5) عند عدم المقدره على دخول الكوول يتم الباس

6) لا يحق للاعب الي كان أول كوول وقال باس إنه يطلب أزيد من 3 لمات

7) يحق للاعب إنه ياخد وز مع صاحب الكول لعدم مقدرته إنه يعلي عليه في عدد اللمات

عند القطع - الكت لابد أن لايكون هذا اللون معاك منه أثناء القطع وإلا يعتبر غش "ديرتي" وتحصل على دون -5
يخصم منك 5 ويمكن إكمال الدور أو إنهائه ويعاد من جديد أو إنهاء الدور وحسابك أنت إنك الخاسر الوحيد (أونلي لوزر وده ليه حساب خاص هنقوله في الآخر )

9) لايجوز أن يطلب أزيد من 2 من الاعبين داش

10) لآي لاعب الحق في أنه يدك الدور في حالة عدم إمكانية حصوله على الحد الأدنى من اللمات ألا وهو 1 بوينت

الأس 4 بوينت / الروا 3 بوينت / الدامة 2 بوينت/ الجاك 1 بوينت / أي رقم أخر زيرو بوينت من 10: 2

11) أعلى الكروت قيمه هو اللي بياخد اللمه

12) القطوع يمكنه أن يحصل على أي لمه حتى لو كانت الإس

طريقة اللعب: ( ركز أوي في دي )

- هنوزع الكوتشينه عالأربع لعيبة وكل واحد يبقى معاه 13 ورقة

-كل لعيب هيرتب ورقة حسب الألوان وبعدين حسب قوة الورقة زي ما قلنا فوق

-بعد كده انتا تحدد القطوع في سرك حسب قوة الورق اللي عندك وعدده

وتستني لو حد عايز يأفويد او يدك الدور لو محدش قال ويت فور يبدأ الكوول

الكول لازم يبدأ باربعة فأكثر مفيش اقل من كده

ساي مثلا انتا معاك فايدك خمس ورقات كاروه وخمس ورقات سبيد..فالقطوع بتاعك تحدده في سرك يا كاروه يا ترفل..اشطة؟

الكول بدأ..واحد قال 4 كاروه اللي بعده يا يزود عليه ويثبته أو يمشي الدور ويقول 4 هارت..مينفعش بأه يقول حاجة اقل منه اللي هيا 4 ترفل

انتا هتقول 5 سبيد اللي بعدك ممكن لو معاه اكتر من خمسة في أي كلر ممكن يثبتك لكن لو معاهوش اكتر من خمسة في كذا احتمال

لو معاه خمسة سبيد برضه ممكن يقول كوول وز ويشاركك في الحساب لو كسب..وممكن يقول خمسة سانز..ولو الكوول رسي عليه مش هيبقى فيه قطوع لان السنز اقوى

وممكن يقول باص عادي جدا

دلوقتي ساي ان الكول رسى على خمسة سبيد..اللي على شمال صاحب الكول هيبقى اسمه الرسك

ممكن لو بتلعبوها انجليزي يبقى اللي على اليمين.. بس كل الناس في مصر بتلعبها امريكاني

المهم الرسك ده آخر واحد بيقول عدد اللمات اللي هوا عايزها

يعني مثلا انتا قلت خمسة بج يبقى عدد المات بتاعك خمسة ولازم تجمع خمسة لاتزيد ولا تقل

الل علي يمينك يحدد بأه هوا عايز كام لمة واللي على يمينه نفس الحوار

يتبقى صاحب الرسك

لو عدد اللمات اللي جمعتوها كان 13 يبقى صاب الرسك ملوش حق الداش..يعني مينفعش يقول انا مش هجيب ولا لمة

لازم يزود عن ال13..وبكده ممكن يقول مثلا 2 رسك

لو عدد اللمات ازيد من 13..يقول اي رقم هوا عايزه أو يداش..لو مفيش قطوع ( دور سانز ) يبقى داش بلايند

لو عدد اللمات اقل من 13 يقول أي رقم بحيث ان عدد اللمات لا يساوي 13

وبكده بأه نبدأ اللعب

واحد فتح الهاند = بيرمي الباز..ساي 5 كاروه..أللي بعده ستة كاروه..اللي بعده مثلا جاك كاروه وبعد كده حد رمى الآس الكاروه

كده صاحب الآس ياخد اللمة وكمان 4 بونت لأنه رمى بالآس..لو رمى بالرواه كان خد 3 بوينت وهكذا

احنا قلنا الترامب كان بج..وانتا ليك خمس لمات لازم تلمهم بغض النظر عن الاسكور

انتا معكش كاروه..ارمى أي حاجة سبيد هتاخد اللمة زي الباشا..بس عشان تاخد باسكور لازم بالآس أو بصورة اي حاجة تانية زيرو بوينت

بفرض انك جبت اللمات بتاعتك خلاص ومعاك كارت ماستر ( كرت كبير ) وعاوز تخلص منه عشان ماتتدبسش في لمة ولا حاجة

لاقيت مثلا عالأرض كاروه وانتا معاك دامة ترفل ومعكش كاروه..والقطوع بج..اخلص من الدامة بسرعة عشان متدبسكش في لمة انتا مش محتاجها وتخسر الدور

يبقى انتا كده حرقت الدامة

هتلعبو بالنظام ده 13 دور كاملين..ولو في دور صعايدة بيتلعب تاني وسكوره * 2 والدور الأولاني ميحسبش

بعد ال13 دور هتلعبو دور الداش

وده بيتلعب عادي بس مفيش حد يطلب فيه داش ، ونتيجته بتتضرب في اتنين كانه دور صعايدة

ثم تلعبو 5 أدوار القطوع بتاعها متحدد مسبقا..بالترتيب ( السانز – الاسبيد – الهارت – الدايموند – التريفل)

بعد انتهاء دور التريفل الاجباري تحسب نتيجة البولة

الادوار دي ممكن تتقلب عادي جدا لو حد قال في الكول عدد لمات أكتر من 7..يعني 8 فأكثر ودي صعبة بس ممكن

ساعتها التامب لازم يتقل حتى لو كانت اللمات دي من نفس اللون..لازم تختارو ترامب تاني

لو أي دور اجباري الاربعة خسرو يتلعب دور صعايدة عادي ونتيجته * 2

أعلى لاعب حاصل على أسكور كنج

واللي بعده.................. صب كينج

واللي بعده.................. صب كوز

والأخير .................. الكوز

حالة شاذة.. الزيرو كنج

لو الكنج في آخر البولة اسكوره كان صفر..وساعتها بتبصو على أربع حاجات

-كان كنج في دور من الأدوار
-
-كان كوز في دور من الأدوار
-
-اسكوره كان اكتر من 100 في دور من الأدوار
-
-اسكوره كان أقل من 100 في دور من الأدوار

ساعتها الكنج بيبقى كوز والكوز بيبقى كنج والاتنين التانيين سب منغير أي حاجة !!!

حصلت معايا مرة واحدة

نيجي للحاجة اللي كل الناس بتهرب منها الحسابات

لو انتو اربعة ممكن واحد بس يقدر يفهم الحساب..

عالعموم الطريقة الجاية هيا الشائعة وهنقولها باسلوب مبسط

واسمها رقم الدور

أولاً : حسابات صاحب الكوول

في حالة المكسب {نضيف} = رقم الدور + عدد اللمات + 10 "للكوول"

في حالة الخساره {نطرح} = رقم الدور + (عدد اللمات الزائده أو الناقصه ) + 10للكوول

ثانياُ : حسابات الوز في الكوول

في حالة المكسب {نضيف} = رقم الدور + عدد اللمات + 10 "للوز"

في حالة الخساره {نطرح} = رقم الدور + (عدد اللمات الزائده أو الناقصه ) فقط

ثالثاً : حسابات الاعب العادي لا رسك ولا كوول

في حالة المكسب {نضيف} = رقم الدور + عدد اللمات

في حالة الخساره {نطرح} = رقم الدور + (عدد اللمات الزائده أو الناقصه )

رابعاً : حسابات الداش بلايند

1) الدور أوفر "عدد اللمات أزيد من 13

في حالة المكسب {نضيف} = رقم الدور + 20

في حالة الخساره {نطرح} = رقم الدور + 20 + (عدد اللمات الزائده أو الناقصه )

|2) الدور أندر عدد اللمات أقل من 13

في حالة المكسب {نضيف} = رقم الدور + 10

في حالة الخساره {نطرح} = رقم الدور + 10 + (عدد اللمات الزائده أو الناقصه )

خامسا : حسابات الداش

1) الدور أوفر "عدد اللمات أزيد من 13

في حالة المكسب {نضيف} = رقم الدور + 10

في حالة الخساره {نطرح} = رقم الدور + 10 + (عدد اللمات الزائده أو الناقصه )

|2) الدور أندر عدد اللمات أقل من 13

في حالة المكسب {نضيف} = رقم الدور + 20

في حالة الخساره {نطرح} = رقم الدور + 20 + (عدد اللمات الزائده أو الناقصه )

سادساً : حسابات صاحب الرسك

في حالة المكسب {نضيف} = مكسبه حسب أي حاله من الحالاات اللي قلناها + 10*(رقم الرسك) رسك عادي - دبل/تريبل

في حالة الخساره {نطرح} = خسارته حسب أي حاله من الحالاات اللي قلناها + 10*(رقم الرسك) رسك عادي - دبل/تريبل

رقم الرسك = 1 أو 2 أو 3 أو 4
***

1/ رسك عادي عدد اللمات + أو - 2

2/ دبل رسك عدد اللمات + أو - 4

3/ تريبل رسك عدد اللمات + أو - 6

4/ كواتر رسك عدد اللمات + أو - 8

سابعاً : حسابات الأونلي

الأونلي ميد هوا الوحيد اللي لم لماته

الأونلي لوزر هوا الوحيد اللي مجبش لماته مظبوط

وفي طريقتين اما نزود عالاسكور بتاعه 10/ نزود على خسارته عشرة

أو نضرب مكسبه / خسارته في اتنين

ثامناً حسابات الصعايدة..بنعيد الدور ونضرب الاسكور في اتنين

حسابات خاصة

لو واحد كان الرسك وطلب أزيد من سبع لمات

لو كسب ( ياسعده يا هناه )

(عدد اللمات + 13 بونس + 10 كول {أكيد هوا اللي هياخد الكول } +10 ريسك )*2 + رقم الدور

لو كان أونلي ميد..ياخد عشرة عادي

لوخسر(ياعيني عليه)

(عدد اللمات الزايدة او الناقصة + 10 كول + 10 رسك )*2 + رقم الدور

لو كان أونلي لوزر يخسر عشرة كمان عادي

حالة خاصة جدا

كبوت استميشن..وده لعيب عقر خد ال13 لمة كلهم

وبيبقى محدد في الكول انه هياخد ال13 طبعا

وعلى كده لازم يكون الدور سانز لان لو كان في قطوع كانهيبقى عنده13 ورقة قطوع وكده التلات لعيبة هيأفودو

وطبعا دي عمري ماشفتها

عالعموم بياخد 50 نقطة بالاضافة لمكسبه ( هوا طبعا أونلي ميد )

والباقيين بيخسرو 25 نقطة اضافية ( بس طبعا مش أونلي لوزرز)

-----------------------------------------

كده الحسابات خلصت والشرح خلص

انا عن نفسي اول مالعبت كنت باخد ورقة فيها الحسابات معايا هشان متلخبطش

البولة عمرها ما تخلص في أعدة الا لو كانت كل حياتك استميشن

وأي سؤال اسألو عشان اللعب هوا اللي بيعلم بس النظري بينفع برضه

حد قالك انى عاوز اتعلمها هى ناقصة كلاكيع بلا استميشن بلا شايب

hoa da el ana 3ezaaaaaaaaaaaaaaaaah ank tb2a 3la tb3tk nice silver كل حاجة عن الاستميشن Estimation, بلاعة الوقت والملل Icon_cheers

هههههههههههههههههههههه

دى للعلم

للى عايز يتعلمها بس

مرسيه على مروركم جميعا يارب يكون الموضوع عجبكم ههههههه انا بهزر اوعى يا جيمى تقلى نلعب استيماشن

هههههههههههههههههههههه lol!

يا استاذ جيمى عندك رساله على الميل و رساله هنا و ادد على الفيس
ياريت الرد ضروووووووووووووورى

» اى حاجة